काभ्रे । काठमाडौं विश्वविद्यालय (केयु)को ३१औं दीक्षान्त समारोह आज काभ्रेपलाञ्चोकको धुलिखेलस्थित विश्वविद्यालय परिसरमा आयोजना हुँदैछ। पहिलो चरणमा २,२०९ विद्यार्थीलाई डिग्री प्रदान गरिने छ, जसमा १७ देशका १९६ विदेशी विद्यार्थी पनि सामेल हुनेछन्।
समारोहमा विभिन्न स्कूलका विद्यार्थीहरू दीक्षित हुनेछन्। यस पटक स्कुल अफ आर्ट्सबाट ८३, स्कुल अफ एजुकेशनबाट २९४, स्कुल अफ इञ्जिनियरिङबाट ३४०, स्कुल अफ ल काबाट ३६, स्कुल अफ म्यानेजमेन्टबाट ३७८, स्कुल अफ मेडिकल साइन्सेजबाट ८८१, र स्कुल अफ साइन्सबाट १९७ विद्यार्थी गरी कुल २,२०९ विद्यार्थी दीक्षित हुने छन्।
दीक्षित विद्यार्थीहरूमा विद्यावारिधी, डिएम र एमसिएच तहका सात, स्नातकोत्तर तहका ३९७, पिजिडी तहका ५०, र स्नातक तहका १,७२८ विद्यार्थी रहेका छन्।
समारोहको अध्यक्षता प्रधानमन्त्री र कुलपति सुशीला कार्कीले गर्ने छन्, जबकि प्रमुख अतिथिका रूपमा नयाँदिल्लीस्थित जवाहरलाल नेहरू विश्वविद्यालयका उपकुलपति प्राध्यापक धुलिपुडी पण्डित उपस्थित हुनेछन्। कार्यक्रममा शिक्षा, विज्ञान तथा प्रविधिमन्त्री र सहकुलपति महावीर पुनलगायतका प्रमुख हस्तीहरू पनि सहभागी हुनेछन्।
विदेशी विद्यार्थीहरूको संख्या १९६ रहेको छ, जसमा अष्ट्रेलिया, अस्ट्रिया, बङ्गलादेश, भुटान, बेलायत, भारत, जापान, मलेसिया, माल्दिभ्स, मेक्सिको, नामिबिया, रसिया, स्पेन, श्रीलङ्का, स्वीडेन, संयुक्त राज्य अमेरिका र भियतनामका विद्यार्थीहरू रहेका छन्।
समारोहमा विभिन्न पदकसमेत प्रदान गरिनेछ। केयुबाट ३१ वर्षमा कूल ५०,४०० विद्यार्थी दीक्षित भएका छन्, जसमा ५,८६० विदेशी विद्यार्थीहरू छन्, जुन करिब १२ प्रतिशत हुन्छ। सबैभन्दा धेरै विदेशी विद्यार्थी भारतका रहेका छन्, जसको संख्या ४,९७६ हो।
अबसम्म, ५८ देशका विद्यार्थीले काठमाडौं विश्वविद्यालयबाट डिग्री प्राप्त गरेका छन्।
प्रकाशित: बुधबार, मंसिर २४, २०८२
